(బాలే అజయ్ – 9290277727, కోరుట్ల)
అమ్మవారి నామస్మరణతో పల్లెలు.. పట్టణాలు ఆధ్యాత్మిక శోభను సంతరించుకోనున్నాయి. అమావాస్యతో పితృపక్షానికి ముగింపు పలుకుతూ.. శక్తి ఆరాధనకు వేదికగా నిలిచే దేవీ నవరాత్రుల సందడికి రంగం సిద్ధమైంది. శనివారం అమావాస్య కాగా, అక్టోబర్ 11 నుంచి శరన్నవరాత్రులు ప్రారంభం కానున్నాయి.
నవరాత్రుల తొమ్మిది రోజులు అమ్మవారిని వివిధ రూపాల్లో అలంకరించి భక్తులు భక్తిశ్రద్ధలతో పూజించనున్నారు. ఆలయాల్లో ప్రత్యేక పూజలు, అభిషేకాలు, కుంకుమార్చనలు, హారతులతో పాటు మహిళలు, యువతులు కోలాటాలు, భజనలు నిర్వహించేందుకు సిద్ధమవుతున్నారు. పలు ప్రాంతాల్లో బోనాలు, అన్నప్రసాద వితరణ వంటి కార్యక్రమాలను ఘనంగా నిర్వహించేందుకు నిర్వాహకులు ఏర్పాట్లు చేస్తున్నారు.
తొమ్మిది రోజులు.. తొమ్మిది శక్తి స్వరూపాలు
శరన్నవరాత్రుల్లో దుర్గాదేవి తొమ్మిది రూపాలను ఆరాధించే సంప్రదాయం ఉంది. తొలి రోజు శైలపుత్రి, రెండో రోజు బ్రహ్మచారిణి, మూడో రోజు చంద్రఘంట, నాలుగో రోజు కూష్మాండ, ఐదో రోజు స్కందమాత, ఆరో రోజు కాత్యాయనీ, ఏడో రోజు కాలరాత్రి, ఎనిమిదో రోజు మహాగౌరి, తొమ్మిదో రోజు సిద్ధిదాత్రి రూపాలను పూజిస్తారు.
అమ్మవారి ప్రతి రూపం వెనుక ఒక ప్రత్యేకమైన ఆధ్యాత్మిక భావం ఉందని భక్తుల విశ్వాసం. శక్తి, జ్ఞానం, ధైర్యం, ఆరోగ్యం, ఐశ్వర్యం, సంతానం, శాంతి వంటి అనుగ్రహాలను కోరుతూ భక్తులు తొమ్మిది రోజుల పాటు అమ్మవారిని కొలుస్తారు.
అమ్మవారి రాకకు స్వాగతం..
ఇప్పటికే ఆలయాలు, దేవీ మండపాల వద్ద శుభ్రత పనులు, విద్యుత్‌ అలంకరణలు, పూల అలంకరణలు ఊపందుకున్నాయి. మహిళలు బతుకమ్మలు, బోనాలు, కోలాటాల కోసం సిద్ధమవుతుండగా.. యువత మండపాల వద్ద సాంస్కృతిక కార్యక్రమాల నిర్వహణకు ఏర్పాట్లు చేస్తున్నారు.
ప్రతి సాయంత్రం అమ్మవారి సన్నిధిలో వినిపించే మంగళహారతులు, భక్తిగీతాలు, కోలాటాల చప్పుళ్లు పండుగ వాతావరణాన్ని మరింత ఆధ్యాత్మికంగా మార్చనున్నాయి. పలు ప్రాంతాల్లో భక్తులకు అన్నప్రసాదం అందించేందుకు నిర్వాహకులు ఏర్పాట్లు చేస్తున్నారు.
విజయదశమితో మహా వేడుకలకు ముగింపు
అక్టోబర్ 11న ప్రారంభమయ్యే శరన్నవరాత్రులు అక్టోబర్ 19న ముగియగా, అక్టోబర్ 20న విజయదశమి వేడుకలు జరగనున్నాయి. ఈ క్రమంలో నవరాత్రుల ప్రతి రోజూ అమ్మవారి దర్శనం కోసం భక్తులు పెద్ద సంఖ్యలో తరలిరానున్నారు.
అమావాస్య చీకట్లు తొలగి.. అమ్మవారి దీపాల వెలుగులు విరజిమ్మే వేళ..
భక్తుల హృదయాల్లో భక్తి జ్యోతి వెలుగుతోంది.
